“S’ka viza pa plotësimin e kritereve kryesore” [video]

9 Nëntor 2016 - 19:13      

Është publikuar raporti i Progresit për Kosovën, në të cilin janë publikuar sfidat dhe progresi i arritur në Kosovë. U tha se Kosova ka arritur progres, por për lëvizje të lirë duhet të plotësohen kushtet kryesore si demarkacioni e luftimi i krimit të organizuar dhe korrupsionit, raporton KTV.

Komisioneri për Politikën e Fqinjësisë dhe Negociatat e Zgjerimit, Johannes Hahn, ka thënë se Kosova nuk ka kohë për të humbur. Hahn, që të premten pritet të jetë në Kosovë, tha se Prishtina ka ndërmarrë disa hapa të rëndësishëm për marrjen e vendimit të lëvizjes së lirë, por duhet të plotësohen dy kriteret kryesore.

Ndërsa shefja e zyrës së BE-së në Kosovë, Natalia Apostolova
tha se kosovarët nuk po ndëshkohen dhe nuk po mbahen qëllimshëm jashtë zonës Shengen. Sipas saj, nëse dikush duhet ndëshkuar, ata janë politikanët që nuk kanë arritur t’i plotësojnë dy kushtet kryesore.

Ajo raportin e progresit ja ka dorëzuar sot kryeministrit Mustafa dhe kryeparlamentarit Veseli.
Veseli tha se Kosova ka vetëm një perspektivë, Bashkimin Evropian.Ndërsa, kryeministri Mustafa theksoi se do ta analizojnë raportin, e më pas do të deklarohet për gjetjet, përparimet dhe ngecjet e Kosovës. Ndërsa presidenti Thaçi tha se Kosova vazhdon të mbetet vendi i vetëm i izoluar në Ballkan.

© KOHA. Të gjitha të drejtat janë të rezervuara.