Raporti i KTV-së për homazhet dhe varrimin e Astrit Deharit [video]

8 Nëntor 2016 - 19:03      

I është dhënë lamtumira e fundit aktivistit të Vetëvendosjes, Astrit Dehari, i cili vdiq të shtunën në qendrën e paraburgimit në Prizren në rrethana të dyshimta, raporton KTV.

Në nderim të Deharit, Lëvizja Vetëvendosje ka organizuar një mbledhje komemorative, në të cilën u tha se nuk do të ndalen së kërkuari drejtësi.

Babai i Astriti, Avni Dehari ka kërkuar që drejtësia për vdekjen e të birit të vihet në vend.
Kryetari i Vetëvendosjes, Visar Ymeri, ka thënë se regjimi i instaluar në Kosovë ka përgjegjësi të drejtpërdrejtë për, siç ka thënë ai, vrasjen e Astritit.

Qindra qytetarë i janë bashkuar marshit protestues për drejtësi, organizuar nga organizatat studentore të Universitetit të Prishtinës.

Nga Kampusi Universitar, në heshtje, qytetarët kanë marshuar nëpër sheshet kryesore të Prishtinës, për të bërë nderimet pranë arkivolit të ish-aktivistit të Vetëvendosjes.
Nga aty trupi i të ndjerit është nisur për në varrezat e fshatit Zllatar të Komunës së Prishtinës ku i është dhënë lamtumira e fundit.

© KOHA. Të gjitha të drejtat janë të rezervuara.