VV: Atdhe Arifi po terrorizohet psiqikisht në burgun e Lipjanit

8 Nëntor 2016 - 16:08      

Lëvizja Vetëvendosje përmes një komunikate për media thotë se Atdhe Arifi po terrorizohet psiqikisht në burgun e Lipjanit.

“Sot, me shqetësim morëm informacione se Atdhe Arifi, i burgosur padrejtësisht, po terrorizohet psiqikisht në mënyrë të vazhdueshme nga autoritetet e burgut të Lipjanit, ku po mbahet padrejtësisht”, thotë VV, transmeton Koha.net.

VV më tutje thote se, “familja e aktivistit Atdhe Arifi, që e kishte vizituar sot atë, na tregoi që Atdheu po provokohet nga zyrtarët e burgut, të cilët gjatë gjithë kohës i futen në dhomë, e marrin nëpër zyra të ndryshme, e terrorizojnë pas mesnate duke hyrë në dhomën e tij me bateri dore, dhe në vazhdimësi i thonë ‘mos bëj vetëvrasje edhe ti, siç ka bërë Astriti’”.

“Vdekja e Astrit Deharit para tri ditësh, dhe pastaj terrorizimi psiqik ndaj aktivistit tonë Atdhe Arifi, flet për terrorin sistematik që po instalohet në Kosovë dhe që për cak ka thyerjen shpirtërore e fizike të të rinjve e të rejave që po guxojnë t’i rezistojnë kësaj Qeverie. Këto metoda fashiste, e kanë shndërruar Kosovën në vend autoritar e policor dhe kjo është e papranueshme dhe e patolerueshme për qytetarët e vendit tonë”, thuhet në komunikatën e VV-së.

Lëvizja Vetëvendosje kërkon lirimin e menjëhershëm të Egzon Halitit dhe Atdhe Arifit.

Burgjet e këtij regjimi VV thotë se nuk janë më ambiente të sigurta, të qeta e normale për të burgosurit, e veçanërisht për të burgosurit politikë. Lirimi i Atdhe Arifit e Egzon Halitit duhet të bëhet menjëherë dhe pa kushte.

© KOHA. Të gjitha të drejtat janë të rezervuara.