Moti i keq në Vlorë, 300 pasagjerë të bllokuar në det

8 Nëntor 2016 - 10:38      

Moti i keq i orëve të fundit ka sjellë erëra të fuqishme dhe dallgë në det. Për pasojë dy tragete të cilët bëjnë linjën Vlorë-Brindisi nuk kanë mundur të ankorohen mëngjesin e sotëm në kalatat e portit të Vlorës, pasi dallgët arrinin në 6 ballë brenda gjirit dhe 7-8 ballë në det të hapur.

Era që frynte rreth 15 m/s ka sjellë vështirësi për ankormin e trageteve në kalata. Si pasojë që prej orës 07:00 të dy tragetet kanë dalë në Radë.

Në bordin e trageteve janë 250 pasagjerë në njërin traget dhe 50 pasagjerë në tragetin tjetër, të cilët presin të qetësohet moti dhe të dalin në tokë, raporton TCH.

Burime nga kapiteneria bëjnë me dije se është pezulluar lundrimi i anijeve të peshkimit deri në qetësimin e motit. Në disa zona ka pasur edhe shkëputje të energjisë elektrike si pasojë e erërave të forta.