Mot i keq përfshin Shqipërinë

7 Nëntor 2016 - 11:13      

Tiranë, 7 nëntor - Reshjet e dendura dhe era e fortë ka sjellë pezullimin e punës në disa sektorë në Portin e Durrësit.

Sipas burimeve nga Autoriteti Portual i Durrësit, puna është ndërprerë në sektorin e peshkimit dhe më pas dispeçeria ka ndaluar daljen në det të peshkarexhave për arsye sigurie.

Burimet thanë se është ndaluar në det edhe lundrimi i anijeve tregtare të tonazhit të ulët dhe të mesëm.

Nga reshjet e dendura të shiut dallgët e detit kanë shkuar disa ballë.

Reshjet kanë sjellë përmbytje të mëdha në qytetin e Gjirokastrës, ku uji ka dalë në rrugët kryesore të qytetit dhe ka bllokuar trafikun.

Trafiku është paralizuar komplet në rrugën nacionale Gjirokastër-Kakavijë, ku uji ka mbuluar të gjithë aksin rrugor. Mediat njoftojnë se disa automjete janë përmbytur nga uji, që është në një lartësi prej 1 metër.

Moti i keq i kësaj fillim jave ka bërë që Qarku i Kukësit të mbetet pa energji elektrike prej mesnatës.

Nga raportimet e para mësohet se shkak i ndërprerjes së energjisë është bërë dëmtimi i linjës së tensionit të lartë në zonën e Qafë Malit.

Megjithatë, grupe të OST-së për riparimin e avarive në rrjetin energjetik kanë zbritur në terren dhe po punojnë për riparimin e defektit në një kohë sa më të shkurtër.

Reshje të dendura shiu do të përfshijnë vendin tonë gjatë ditës së sotme, sipas parashikimit të sinoptikanëve.

Si pasojë e përkeqësimit të motit Ministria e Punëve të Brendshme ka urdhëruar ngritjen e Shtabeve të Emergjencave në të gjithë vendin.