Kryeprokurori i Speciales sot e deri më 11 nëntor në Prishtinë e Beograd

7 Nëntor 2016 - 10:00      

Hagë, 7 nëntor – Prokurori special për krimet e UÇK-së në Kosovë në vitet 1998 dhe 1999, David Schwendiman, do të qëndrojë në Prishtinë e Beograd nga sot e deri më 11 nëntor, bëhet e ditur nga Zyra e Prokurorisë Speciale në Hagë.

Njoftimi thekson se në këtë mënyrë ai konfirmon vendosmërinë për të realizuar mandatin, por pa hyrë në hollësitë e hetimeve, transmeton Koha.net.

Bëhet e ditur po ashtu se Schwendiman gjatë kësaj vizite do të prezantohet se kryeprokuror i Prokurorisë Speciale të sapoformuar, dhe se do të theksojë vendosmërinë për të çuar deri në fund mandatin e tij në mënyrë energjike dhe të pavarur si dhe të konfirmojë përkushtimin e tij dhe të bashkëbiseduesve në zbatimin e këtij procesi, thuhet në kumtesën për medie të Prokurorisë Speciale.

“Ai nuk do të hyjë në hollësi rreth përmbajtjes së vetë hetimit”, shton kumtesa.

Në Prishtinë kryeprokurori special Schwendiman do të takohet me përfaqësuesit e Qeverisë së Kosovës, me kryeprokurorin e Shtetit si dhe me përfaqësuesit e EULEX-it dhe të bashkësisë ndërkombëtare.

Edhe në Beograd kryeprokurori Schwendiman do të takojë zyrtarë të Qeverisë serbe, përfaqësues të Prokurorisë së këtij vendi për krime lufte si dhe përfaqësues të bashkësisë ndërkombëtare, thekson komunikata. 

© KOHA. Të gjitha të drejtat janë të rezervuara.