Raport i KTV-së për rastin e shtatë të arrestuarve për terrorizëm [video]

6 Nëntor 2016 - 19:04      

Prokurori i Shtetit ka thënë se shtatë persona të dyshuar si pjesëtarë të organizatës terroriste “Shtetit Islamik”, të arrestuar javën e kaluar, kishin planifikuar sulme në Ballkan dhe kanë pranuar instruksione nga militantë në Siri.

“Shtatë të arrestuarit kishin kontakte në vendet fqinje, si në Maqedoni e Shqipëri, dhe të dyshuar të tjerë nga i njëjti grup mbesin në arrati”, thuhet në një dokument të Prokurorit të Shtetit.

Sipas prokurorisë, shtatë të dyshimtit për terrorizëm kanë qenë në kontakt me të vetëshpallurin komandant i shqiptarëve në Siri dhe Irak, Lavdërim Muhaxheri, gjatë muajit shtator dhe tetor të këtij viti, i cili u kishte dhënë instruksione atyre për sulmet.

“Ata kanë përgatitur sulme terroriste në territorin e Ballkanit, por së pari në Kosovë. Ata kanë planifikuar të sulmojnë ndërtesa të ndryshme, përfshirë edhe institucione të sigurisë”, ka thënë prokuroria.

Policia antiterror ka arrestuar shtatë të dyshimtë në tri qytete të ndryshme të premten dhe këtij grupi i është caktuar masa e paraburgimit prej 30 ditësh.

© KOHA. Të gjitha të drejtat janë të rezervuara.