Studentët drejtojnë një mori pyetjesh drejt institucioneve për vdekjen e Astrit Deharit

6 Nëntor 2016 - 16:26      

Duke pasur si obligim mbrojtjen e të drejtave të studentëve, organizata studentore “Roforma” thotë se me dhimbje ka marrë lajmin e ndarjes së parakohshme nga jeta të kolegut Astrit Dehari.

“Gjithashtu shprehim ngushëllimet më të sinqerta familjarëve, miqve dhe të gjithë atyre që ndiejnë dhimbje për Astritin. Ne si studentë dhe kolegë të Astritit, shprehim indinjatën e thellë për trajtimin e tij gjatë kohës sa ishte në paraburgim dhe po ashtu, lajmi se Titi vdiq nga mbidoza e medikamenteve na bënë të kemi dyshimet tona për vdekjen e parakohshme të tij, duke dashur të kemi dritë mbi këto dyshime”, thuhet ne reagimin e kësaj organizate.

Me këtë rast i bëjmë pyetje publike Shërbimit Korrektues dhe Ministrisë e Drejtësisë:

Kush i dha medikamentet e panevojshme që sipas jush Astriti ndërroi jetë si pasoj e përdorimit të tyre?

Nëse me të vërtetë medikamentet e panevojshme mbërritën deri në dhomën ku ishte Astriti, kush e lejoi këtë?

Si u trajtua kolegu ynë nga shërbimi mjekësor në burgun e Prizrenit?

Duke e ditur se një i burgosur nuk ka të drejtë të qëndrojë i vetëm në dhomën e burgut në kohën e shëtitjes për të burgosur, e që sipas jush ai qëndroi aty i vetëm, kush e lejoi?

Kur Astriti kërkoi mjekim, a iu ofrua?

Sipas jush, nëse Astriti i përdori ato medikamente, a ishte prezent mjeku ose a ishte nën mbikëqyrje mjekësore?

A ka bërë ndonjëherë ankesë kolegu ynë Astriti dhe a është trajtuar ankesa e tij nga Shërbimi Korrektues?

“Për të gjitha këto pyetje kërkojmë shpjegim nga Ministria e Drejtësisë dhe Shërbimi Korrektues i Kosovës”, thuhet në letër.

Kërkojmë nga institucionet gjegjëse që vdekja e Astritit të mos hetohet ashtu si u hetua rasti i Dino Asanajt!

Në nderim të kolegut tonë Astrit Dehari i ftojmë qytetarët që të marrin pjesë në homazhe, sot (E diel ora 17:00) në sheshin "Skenderbu" - Prishtinë, thuhet në fund të letrës.

© KOHA. Të gjitha të drejtat janë të rezervuara.