Zgjedhjet në Drenas kushtojnë 260 mijë euro

4 Nëntor 2016 - 19:10      

Komisioni Qendror Zgjedhor ka ndarë mbi 260 mijë euro buxhet për zgjedhje të jashtëzakonshme, që do të mbahen më 4 dhjetor në Drenas.

Në këtë mbledhje, është vendosur që fushata zgjedhore të jetë pesë ditë dhe të jenë katër qendra të votimit, raporton KTV.

Në mbledhjen e kryesuar nga Sami Hamiti nga LDK-ja, është kritikuar mosprania e kryetares Valdete Daka, e cila ishte në takimin e thirrur nga presidenti Thaçi.

Adnan Rrustemi nga VV-ja ka kundërshtuar pjesëmarrjen e Dakës në takimin e partive politike, duke e quajtur takimin me karakter politik, që mund ta vë në dyshim paanshmërinë e KQZ-së.

Edhe Betim Vishaj ka shprehur shqetësimin se në çfarë cilësie ka shkuar Daka në takim.

Ndërkaq, Sami Hamiti tha se takimi ka qenë me kërkesën e presidentit dhe se kërkesa e tij është legjitime sepse ai nuk u takon partive politike.

© KOHA. Të gjitha të drejtat janë të rezervuara.