Valbona mund të humbasë gjithë turistët! [video]

4 Nëntor 2016 - 10:09      

Vetëm pak ditë pasi revista e njohur amerikane National Geographic e kishte renditur Valbonën në mesin e nëntë vendeve më ideale në botë për të shijuar natyrën, kjo luginë e Bjeshkëve të Nemuna, mund të humbas gjithë turistët.

Kjo pasi prej disa vitesh kompani të energjetikës, kanë shprehur interesim të ndërtojnë hidrocentrale përgjatë lumit Valbona. Qeveria shqiptare në Tiranë, kishte dhënë koncesione për ndërtimin e 11-të hidrocentraleve në Valbonë, por pas kundërshtimeve dhe protestave si të banorëve të rrethit të Tropojës ashtu edhe të qytetarëve të tjerë shqiptarë, qeveria Rama ka anuluar 9-të prej këtyre 11-të projekteve. Por edhe dy hidrocentralet e mbetura, janë të padëshiruar nga banorët dhe ata që e vizitojnë Valbonën.

Kjo pasi në rast se projektet për to përfundojnë, ato parashohin ta fusin lumin e Valbonës në një pjesë të rrjedhës së tij, në kanale me tuba, çka shumica besojnë që kjo do ta vriste lumin, përkatësisht do ta shkatërronte biodiversitetin e lumit dhe gjithë ekosistemin përreth tij. Nga këtej, lugina e Valbonës rrezikon të shndërrohet në një zonë të vdekur: pa faunë dhe me florë të dëmtuar. Kjo do të çonte natyrshëm në rënien e turizmit në Valbonë.

Për këtë arsye, banorëve të rrethinës u janë bashkuar qindra njerëz nga pjesë të tjera të Shqipërisë, në koncertin protestë që këtë fundjavë u mbajt në Valbonë. COSMO në KTV sjell gjithë historinë e këtyre protestave - siç e thotë motoja e tyre - për t'ju thën "Jo HEC-ve"

© KOHA. Të gjitha të drejtat janë të rezervuara.