Rrëfimi i minatorit që po i shkakton probleme Ligjit të Trepçës [video]

3 Nëntor 2016 - 19:09      

Ish-minatori Besnik Beqiri u ndje mirë për ish-kolegët e tij kur para disa ditësh Ligji për Trepçën më në fund mori nënshkrimin e presidentit Thaçi, raporton KTV.

Por as që i kishte shkuar mendja që rasti i tij, që aktualisht është në Dhomën e Posaçme të Gjykatës Supreme, do të mund ta kthente ligjin në pikën zero, transmeton Koha.net.

Beqiri kishte pësuar lëndim të rëndë në vitin 2013 në flotacionin e Kishnicës, për çka kishte marrë rreth 20 mijë euro nga sigurimi shëndetësor, por pretendon se edhe afër 20 mijë të tjera i kanë mbetur borxh.

Ai nga ekspertë është shpallur 100 % i paaftë për të kryer punë të rënda fizike dhe është vlerësuar t’i jetë zvogëluar aktiviteti i përgjithshëm jetësor në 60%.

Avokati i tij, Sylejman Klinaku, thotë se do të presin përgjigjen e Gjykatës Kushtetuese, por edhe sqarimet nga qeveria, pasi e sheh të palogjikshme që të bëhet bartja e aseteve, por jo edhe e obligimeve të Trepçës.

Por, sipas Besnik Berishës, këshilltar i Kryeministrit Mustafa, Ligji për Trepçën tashmë është konstatuar se është në përputhje me kushtetutën dhe se i njëjti nuk cenon asnjë të drejtë.

© KOHA. Të gjitha të drejtat janë të rezervuara.