Ligjit për Trepçën i del një problem tjetër [Raport i KTV-së]

3 Nëntor 2016 - 19:01      

Probleme të reja ligjore kanë dalë për Ligjin e Trepçës, raporton KTV.

Pas hedhjes poshtë që Gjykata Kushtetuese i bëri ankesës së Listës Serbe, tani i është dërguar një tjetër kërkesë për ligjin e njëjtë.Këtë tani e ka bërë gjyqtari i Dhomës së Posaçme të Gjykatës Supreme, Werner Kannenberg, transmeton Koha.net.

Në kërkesën e tij, që e ka siguruar KTV-ja, ai vë në dyshim kushtetutshmërinë e Ligjit për Trepçën. Në veçanti, gjyqtari konteston pjesët e ligjit lidhur me të drejtën themelore të pronës ose nenin 46 të Kushtetutës së Kosovës, meqenëse gjyqtari i EULEX-it është i caktuar në një lëndë ku është paditur Trepça nga një ish-punëtor.

Gjyqtari thotë se kërkesa e mëhershme e Listës Serbe nuk e parasheh të njëjtën çështje, që është thelbi i kërkesës së tij.

Këtë e arsyeton me faktin se kjo nuk ka të bëjë me shkeljen e të drejtave të pronarëve të Trepçës, të cilët ka nevojë të identifikohen por me cenimin e pronës së paditësit në fjalë, i cili është kreditor i Trepçës nën administrim të AKP-së.

Gjykata Kushtetuese e Kosovës ka konfirmuar për KTV-në se e ka pranuar këtë kërkesë.

© KOHA. Të gjitha të drejtat janë të rezervuara.