Ymeri: S’ka kohë për reformë zgjedhore, zgjedhjet janë zgjidhje

3 Nëntor 2016 - 17:21      

Visar Ymeri është figura e dytë nga opozita, pas Ramush Haradinajt, që nuk do të marrë pjesë në takimin e nesërm të thirrur nga presidenti Hashim Thaçi, për “Reformën Zgjedhore”.

Ymeri, që ka folur për Koha.net, ka thënë se nuk do të marrë pjesë në takim dhe së zgjidhje janë zgjedhjet.

“E refuzoj këtë ftesë për reformë zgjedhore. Zgjedhjet janë zgjidhja e vetme. Në të mirë të vendit”, ka thënë Ymeri, i cili shton se në këtë kohë kur, sipas tij, korrupsioni kronik i qeveritarëve të PDK-së dhe LDK-së në nivele qendrore e lokale ësht bërë publik, nuk ka kohë për reformë zgjedhore.

Koha sipas Ymerit është për zgjedhje.

“Tash kur institucionet e qeveria e Kosovës e kanë humbur legjitimitetin pas projekteve antikombëtare të kësaj qeverie, projekte që sollën tensionim të paparë mes qeverisë e popullit, nuk është koha për reforma por për zgjedhje! Tash kur populli i Kosovës i varfëruar deri në skaj e gjithnjë e më i papunë prej privatizimeve të kësaj klike po merr rrugët e emigrimit si pasojë e faktit që qeveria PDK-LDK nuk ka ndërmarrë asnjë politikë në ndihmë të ekonomisë e punësimit, tash s'është koha për reforma, por vetëm për zgjedhje”, ka folur më tej Ymeri, që shton se zgjedhjet e reja, po të mbahen të ndershme, do të prodhonin legjitimitet për institucionet dhe mbi të gjitha do të sillnin mundësinë për ndryshim që aq shumë i duhet Kosovës.

© KOHA. Të gjitha të drejtat janë të rezervuara.