“Duhet ndërprerë dialogun me Serbinë”

1 Nëntor 2016 - 21:34      

Deputeti i LVV-së, Driton Çaushi vlerësoi se dialogut Kosovë – Serbi i duhet një reciprocitet, e që sipas tij për këtë duhet vullnet i institucioneve të Kosovës.

Ai në Rubikon të KTV-së theksoi se reciprociteti është ajo çfarë i duhet këtij dialogu mirëpo si i tillë nuk është i mundur me Serbinë aktuale.

“Ne kishim një diskutim në Kuvendin e Kosovës lidhur me arrestimin e Nehat Thaçit dhe aty u propozua një rezolutë nga deputeti Gëzim Kelmendi. Ne propozuam një rezolute e cila ne mendojmë se përfshinte kushtet kryesore për zgjidhjen e kësaj situatë. Ne nuk mund të pretendojmë se me Serbinë aktuale mund të kemi reciprocitet, deri sa nuk ekziston një vullnet i institucioneve të Kosovës atëherë nuk mund të ketë reciprocitet”, ka thënë Çaushi.

“Cili është roli i Kuvendit nëse këto raste po vazhdojnë të përsëriten? Do të nxjerrim nga një rezolutë për secilin rast dhe të vetëkënaqemi me këtë”, shtoi tutje Caushi.

Sipas tij, dialogu me Serbinë duhet të ndërpritet dhe këtë ai tha që e kanë kërkuar edhe në Kuvend.

© KOHA. Të gjitha të drejtat janë të rezervuara.