“Kosova po prodhon shumë mjekë e infermierë” [video]

1 Nëntor 2016 - 19:20      

Kosova po prodhon numër të madh të mjekëve dhe infermierëve, andaj është e vështirë që të gjithë të sistemohen nëpër institucione publike, raporton KTV.

Në një interpelancë në mes të senatorëve të rinj dhe ministrit të Shëndetësisë, Imet Rrahmani, ky i fundit pranoi se MSH-ja këtë vit ndau specializimet, bazuar në nevojat individuale dhe jo në nevojat e institucioneve.

Kur u pyet për ikjen e profesionistëve shëndetësorë jashtë vendit, Rrahmani tha se është dukuri, të cilën ai nuk mund ta ndalojë.
Sa i përket interesimit për mungesën e barnave, ministri e pranoi se asnjëherë deri tash nuk është arritur që të përmbushet lista esenciale.

Në këtë interpelancë pati pyetje, të cilat ishin sfiduese për kreun e shëndetësisë. Rrahmani gjithashtu theksoi se gjatë punësimeve të fundit të mjekëve të papunë, ministria ka vërejtur se shumica e tyre kishin nga një vend pune nëpër institucionet private, gjë që sipas ministrit, edhe ky duhet të konsiderohet një vend pune.

© KOHA. Të gjitha të drejtat janë të rezervuara.