Më 23-24 nëntor në Strasburg zhvillohet takimi i dytë BE-Kosovë për MSA-në

1 Nëntor 2016 - 15:07      

Përgatitjet për takimin e dytë të Komisionit Parlamentar për Stabilizim Asociim BE-Kosovë, i cili do të mbahet me datë 23-24 nëntor në Strasburg, ishte temë e debatit të sotëm gjatë mbledhjes së Komisionit Parlamentar për Stabilizim Asociim.

Kryetari i këtij Komisioni, njëherësh nënkryetari i Kuvendit, Xhavit Haliti, duke vënë në spikamë rëndësinë e këtij takimi, vlerësoi se debatet dhe çështjet që do të ngrihen atje, duhet të jenë në frymën e një bashkëpunimi të brendshëm e në interes të vendit.

“Duhet të përgatitemi që kërkesat tona, si dhe çështjet të cilat do të arrijmë t’i fusim në agjendën e takimit, të përfundojnë në formë rekomandimesh”, tha ai.

Anëtarët e komisionit shprehën përkushtimin e tyre që në takimin e Strasburgut të shkojnë të përgatitur mirë, bazuar edhe në përvojën e arritur nga takimi i parë i takimit të përbashkët, i cili gjatë muajit maj është mbajtur në Prishtinë.

Konsultimet brenda Komisionit lidhur me këtë takim, do të vijojnë edhe gjatë mbledhjeve të radhës. 

© KOHA. Të gjitha të drejtat janë të rezervuara.