SPERTK shpreh shqetësimin për shkurtimin e buxhetit për RTK-në

1 Nëntor 2016 - 15:03      

Sindikata e Punëtorëve e RTK-së ka marrë me shqetësim lajmin për shkurtimin e buxhetit të RTK-së nga 0.7% në 0.5%. Me këtë ndarje të buxhetit nga Qeveria e Kosovës, RTK-së i pamundësohet funksionimi normal tani e tutje, thuhet në një reagim të kësaj sindikate.

SPERTK vazhdimisht i ka bërë thirrje themeluesit të saj Kuvendit të Kosovës, që sa më parë të siguroj buxhetin e mjaftueshëm për funksionimin normal të RTK-së por një gjë e tillë tashme nuk ndodhi, transmeton Koha.net.

SPERTK edhe një herë i bënë thirrje Kuvendit të Kosovës, që ta marrë parasyshë propozimin e EBU-së sa i përket financimit të mjaftueshëm dhe të pavarur të RTK-së. Sindikata e Punëtorëve e RTK-së nuk do të pajtohet asnjëhere me rrezikimin e funksionimit të mediumit të vetëm publik RTK.

SPERTK u bënë thirrje të gjithë aktorëve dhe në veçanti Kuvendit të Kosovës të ndërmarrë masa për të garantuar funksionimin e pavarur të RTK-së, të miratojë Ligjin për RTK-në, i cili tashmë është jetik për funksionimin e mediumit publik, me të cilin do të garantohet zgjidhja e përhershme dhe pavarur e financimit, definimi i pronës, digjitalizimi e shumë çështje të tjera.

SPERTK zvogëlimin e buxhetit e konsideron ndërhyrje direkte në punën e RTK-së dhe po ashtu beson se këtë shumë të ndarë për RTK-në nga Qeveria, Kuvendi i Kosovës ta ndryshojë dhe ta rrisë për të mos shkaktuar pakënaqësi dhe protesta, të cilat duket se do t’i kemi të pashmangshme për të mbrojtur dinjitetin tonë dhe mediumin publik, RTK-në. Andaj kërkojmë urgjentisht që forma dhe shuma e ndarë të ndryshohet dhe te rritet, thuhet në reagimin e SPERTK-ut. 

© KOHA. Të gjitha të drejtat janë të rezervuara.