Limaj: Tash e pas do të punoj në demaskimin e prokurorëve e gjyqtarëve të kapur

28 Tetor 2016 - 21:47      

Pas aktakuzës së sotme për krime në popullatën civile ndaj Fatmir Limajt, ai në një intervistë në transmetuesin publik ka thënë se sistemi i drejtësisë është i mbushur me prokurorë e gjyqtarë që punojnë për të rrënuar persona të caktuar.

Limaj ka thënë se tash e pas do të punojë për të demaskuar personat dhe grupet që po përdorin institucionin për të shkatërruar persona të caktuar.

Fatmir Limaj, që njihet edhe me nofkën “Çeliku”, ka thënë se gjyqtarët që kanë punuar në sistemin e Millosheviqit nuk duhet të mbajnë poste publike. Ai ka shtuar se ka edhe të tjerë që në atë kohë kanë lëshuar punën dhe janë angazhuar me punë krejt tjera.

“Gjyqtarët që kanë punuar në sistemin e Millosheviqit nuk mund të mbajnë poste publike. Është dashur edhe ata të veprojnë sikur disa kolegë që kanë lëshuar punën dhe kanë punuar taksist ose diçka tjetër”, theksoi Limaj.