Tahiri herë thotë se Kosova ka e herë se s’ka kushte për Serbinë [video]

28 Tetor 2016 - 19:24      

“Kosova nuk i ka vënë kushte Serbisë, pasi shtetet sovrane nuk i vënë kushte njëra-tjetrës”, ka thënë ministrja për dialog Edita Tahiri, dy ditë pasi prezantoi para deputetëve dokumentin, ku tha se Kosova ka kushte të reja për fazën e tretë të bisedimeve.

Tahiri ka insistuar se fjala është për një varg kushtesh që në fakt Bashkimi Evropian i ka caktuar për Serbinë, e cila nuk po i zbaton marrëveshjet e arritura në Bruksel.

Dokumenti i dorëzuar nga Tahiri në Kuvend, këtë javë, e që në fakt në Bruksel kishte arritur 2 vjet e gjysmë më parë, ka ngritur reagime të ashpra në Beograd.

Qeveria serbe u mblodh urgjentisht dhe tha se nuk e ka ndërmend ta diskutojnë demarkimin e kufirit, sepse Vuçiq e cilësoi këtë si tendencë për ta poshtëruar Serbinë.

Sidoqoftë, Tahiri ka vënë sot gur-themelin e pikës së shtatë kufitare mes Kosovës dhe Serbisë në Kapi të Sfircës, i cili doli nga marrëveshja e IBM-të, e cila do të shkurtojë lidhjen mes Medvegjës dhe Bujanocit me Kosovën për 60 deri në 80 kilometra.

Ajo u tha banorëve të zonës së re kufitare se nuk ka qenë e lehtë të bindet Serbia për këtë kufi, por që me vendosmëri, ia kanë arritur.

Tahiri herë thotë se Kosova ka e herë se s’ka... by kohanet

© KOHA. Të gjitha të drejtat janë të rezervuara.