Punëtorët e larguar nga KEDS-i bllokuan hyrjen e Kuvendit [video]

27 Tetor 2016 - 19:28      

Një numër punëtorësh të larguar nga KEDS-i kanë bllokuar dyert e Kuvendit të Kosovës, duke kërkuar zgjidhje të problemeve të tyre, raporton KTV.

Punëtorët kanë kërkuar ndihmën e shtetit që t’i kthejë në punë, pasi kishin kontrata të përhershme dhe se u larguan pa të drejtë nga ndërmarrja, transmeton Koha.net.

Me gjithë përpjekjet, disa deputetë dhe punëtorë të kuvendit u detyruan të përdorin hyrjet tjera, për t’u futur në këtë objekt, pasi punëtorët protestues nën brohoritjet e ndryshme nuk lejonin hyrje-daljen.

Para tyre u paraqit Albulena Haxhiu e Vetëvendosjes, e cila iu dha mbështetje në kërkesat e tyre.

Protestuesit pritën një kohë për t’u takuar me zyrtarë të legjislativit, por pritja iu shkoi huq, pasi nuk i priti askush.

Ata kanë paralajmëruar vazhdim të protestave, deri sa të bëhet zgjidhja për ta, pasi besojnë se KEDS-i po përgatit edhe listën e re të largimit të punëtorëve.

Drejtues të Inspektoratit të Punës i kanë thënë KTV-së të kenë marrë një numër të madh të ankesave të punëtorëve dhe se të njëjtat janë duke i shqyrtuar. Sipas tyre, nëse merret vendimi në favor të punëtorëve, atëherë KEDS-i do t’i kthejë ata në punë, siç ka bërë edhe me punëtorë të tjerë që kanë fituar rastin në këtë institucion.

© KOHA. Të gjitha të drejtat janë të rezervuara.