Zyra e BE-së e KGJK kritikojnë seancën e sotme, Presidenca nuk përgjigjet [video]

27 Tetor 2016 - 19:11      

Debati për rastin Drenica, të enjten në Kuvend, është bërë hera e dytë që deputetët komentojnë vendimet gjyqësore, raporton KTV.

Në 2013, me inicim të ish-deputetit të PDK-së Ramiz Lladrovci, ishte debatuar për rastin Kiqina, transmeton Koha.net.

Shumë institucione ndërkombëtare e vendore kanë kritikuar këtë debat, duke e konsideruar ndërhyrje të drejtpërdrejtë në sistemin e drejtësisë, pushtet i ndarë nga politika.

Zyra e BE-së në Prishtinë ka kërkuar nga Kuvendi i Kosovës që të përmbahet duke mos komentuar vendimet gjyqësore. Këshilli Gjyqësor i Kosovës ndërkaq ka thënë se palët duhet të ndjekin rrugët ligjore, përmes ankesës si mjet i rregullt juridik.

Deputetët, përfshirë kryetarin e Kuvendit, Kadri Veseli, kanë vënë në pikëpyetje vendimin e Gjykatës Themelore të Prishtinës dhe asaj të Apelit, duke thënë se dënimi do të duhej të bëhej me prova të qarta dhe të besueshme.

Ish-udhëheqësi politik i UÇK-së, tani President i vendit, Hashim Thaçi, nuk ka pranuar të flasë për debatin rreth dënimit të Grupit Drenica.

KTV-ja ka pyetur zyrën e tij për këtë, por nuk kanë kthyer përgjigje.

© KOHA. Të gjitha të drejtat janë të rezervuara.

Zyra e BE-së e KGJK kritikojnë seancën e sotme... by kohanet