Debat me përplasje, akuza e fyerje për mbrojtjen e vlerave të UÇK-së [video]

27 Tetor 2016 - 19:02      

Debat i gjatë është bërë në Kuvendin e Kosovës, në seancën e jashtëzakonshme të thirrur nga PDK-ja, në mbrojtje të vlerave të UÇK-së, raporton KTV.

Debati nisi duke folur për luftën e pastër të UÇK-së, duke i quajtur të padrejta dënimet për ish-luftëtarët, vazhdoi me akuza e kundër akuza, u fol për patriotë e tradhtarë, deri në replika e kundër-replika me gjuhë degraduese, për të dalë edhe te FIFA, UEFA e stadiumet moderne të futbollit, transmeton Koha.net.

Dikush u tregua krenar që nuk i dha votë gjykatës speciale, e të tjerë me krenari tregonin për votën pro, që e dhanë për specialen në 3 gushtin e 2015-ës. PDK-ja i quajti të padrejta dënimet e çlirimtarëve, e LDK-ja kërkoi të mos ketë ndërhyrje në drejtësi.

Ndërhyrje në drejtësi e ka parë edhe Fatmir Limaj, i cili ka kaluar e po kalon në disa procese gjyqësore. Ndërsa Zafir Berisha ka kërkuar që Hashim Thaçi të shpallet tradhtar i kombit. Ai pat përplasje edhe me zëvendëskryeministrin Hajredin Kuçi. Replikat kanë vazhduar edhe mes Donika Kadaj Bujupit me deputeten e PDK-së Xhevahire Izmaku, deri kur gjuha degradoi.

Ndërkohë, Bekim Haxhiu e akuzoi Vetëvendosjen se i ka sponsorizuar raportet e Dick Martyt kundër UÇK-së e këtu përplasje pat me Fisnik Ismailin.

Ky debat në Kuvendin e Kosovës u mbajt pavarësisht kritikave që ishin nga vendës e ndërkombëtarë se kjo seancë është drejtpërdrejt ndërhyrje në drejtësi.

© KOHA. Të gjitha të drejtat janë të rezervuara.