BE dhe KGJK kërkojnë që Kuvendi të mos komentojë vendimet gjyqësore

27 Tetor 2016 - 11:18      

Zyra e BE-së në Prishtinë ka kërkuar nga Kuvendi i Kosovës që të përmbahet duke mos komentuar vendimet gjyqësore.

Në një përgjigje për KTV-në, iu është kujtuar deputetëve që pushtetet janë të ndara, si një nga parimet themelore të demokracisë.

“Parlamenti është vend ku bëhet debat politik për çështjet kryesore në interes të popullit. Ky debat megjithatë, duhet të jetë në përputhje të plotë me ndarjen e pushteteve, gjyqësore, ekzekutive dhe legjislative, si themel i demokracisë. Zyrtarët e zgjedhur dhe autoritetet publike, përfshirë deputetët, duhet të përmbahen nga vënia në pikëpyetje e vendimeve gjyqësore meqenëse zbatimi i parimeve të ligjit kërkon respektim të pakushtëzuar të vendimeve gjyqësore dhe ndarjen e pushteteve”, ka thënë Zyra e BE-së.

Për debatin në Kuvend, ka reaguar edhe Këshilli Gjyqësor i Kosovës, duke kërkuar nga partitë politike që të përmbahen nga deklarata lidhur me vendime gjyqësore.

“Vendimet e gjykatës janë vendime të bazuara në ligj,andaj kushdo që kërkon ndërhyrje në këto vendime bënë ndërhyrje të drejtpërdrejtë dhe cenon punën e pavarur të gjyqësorit. Këshilli Gjyqësor i Kosovës, është duke bërë të pamundurën që të kthehet besimi i qytetarëve në sistemin e drejtësisë, kështu që një veprim i tillë është pengesë në realizimin e këtij qëllimi”, thuhet në reagim të KGJ-së.

© KOHA. Të gjitha të drejtat janë të rezervuara.