Në Suboticë jetojnë 384 shqiptarë, furrtarët ndihmojnë të varfrit

27 Tetor 2016 - 11:07      

Sipas regjistrimit të fundit të popullsisë në vitin 2011, në territorin e qytetit Suboticë, Vojvodinë, jetojnë 141.554 banorë. Nga ta shqiptarë janë deklaruar 384, transmeton Koha.net.

Siç njofton portali vojvodinas autonomija, këta shqiptarë në Suboticë jetojnë pahetueshëm, nuk kanë seli të ndonjë këshilli kombëtar ose ndonjë shoqatë e kur përmenden ndonjëherë, kjo bëhet kryesisht për të keq.

Sipas portalit, pak kush di se disa familje shqiptare janë shumë aktive në punën humanitare e shembull për këtë janë furruat e tyre “Proleće” dhe “Arena”, të cilat kanë ndihmuar nxënësit e shkollës speciale “Žarko Zrenjanin” që të mos mbeten të uritur.
Në këtë shkollë, 80 për qind e nxënësve vijnë nga familje që jetojnë buzë skamjes. Këta fëmijë nuk mbeten të uritur falë aksionit të furrtarëve shqiptarë nga Subotica e të ndihmuar edhe nga pushteti lokal.

Kështu, Isen Martinaj, pronar i furrës “Proleće”, në bashkëpunim me pushtetin lokal, gjatë vitit 2014, për 180 ditë, ka siguruar shujta për këta nxënës.
Agron Martinaj, i biri i pronarit të furrës gjatë këtij aktiviteti pati ftuar edhe të tjerët të ndihmonin nxënësit në nevojë e që në shkollën e përmendur janë 114 sish.

Pas kësaj furre, në vitin 2015 detyrimin e kishte marrë furra “Arena” e pronarit Fitim Çenaj, e cila ka dërguar shujta për 90 nxënësit e shkollës.
Bëhet fjalë për 20 mijë racione për vitin 2014 dhe për 15 mijë racione për vitin 2015.

Furra e shqiptarëve edhe në këtë qytet janë djegur nga huliganë serbë në vitin 2014, menjëherë pas ndeshjes Serbi – Shqipëri që u ndërpre më 14 tetor 2014 në minutën 41, pas lëshimit të dronit i me hartën e viseve etnike të shqiptarëve dhe pas rrahjes së lojtarëve shqiptarë në fushë.

© KOHA