Borxhi ndaj punëtorëve në “Llamkos” llogaritet mbi një milion euro [video]

23 Tetor 2016 - 19:19      

Më shumë se 1 milion euro llogariten të jenë obligimet e papaguara nga dy kompanitë që blenë fabrikën “Llamkos” nga Vushtrria ndaj punëtorëve të kësaj fabrike.

Punëtorët nuk kanë lënë vend pa u ankuar, por askush deri më sot nuk u doli në ndihmë, raporton KTV.

Paralajmërojnë edhe grevë për të marrë mjetet që u takojnë.

Kryetari i sindikatës së punëtorëve të kësaj ndërmarrjeje, Ragip Hasani, deklaron të kenë kërkuar edhe ndihmën e prokurorisë për të hetuar formën e privatizimit të ndërmarrjes, që dikur punësonte rreth 500 punëtorë.

Por, kjo situatë nuk pritet të zgjidhet në një afat të shkurtë.

Kryetari i Dhomës së Posaçme të Gjykatës Supreme të Kosovës, Sahit Sylejmani, i ka thënë KTV-së, nëpërmjet telefonit, se nuk ka një afat të shpejtë për zgjidhjen e situatës në këtë ndërmarrje.

Blerësi i fundit i ndërmarrjes në fjalë i kishte mbetur borxh mbi 700 mijë euro bankës Raiffeisen, një pjesë të së cilës banka ka arritur ta nxjerrë.

© KOHA. Të gjitha të drejtat janë të rezervuara.