Arifi: Kjo qeveri është kalbur në kokë, s’i bën punë as riformatimi

22 Tetor 2016 - 21:03      

Në kohën kur po flitet për zgjedhje të jashtëzakonshme apo riformatim thelbësor të Qeverisë së Kosovës, anëtari i Kryesisë dhe kryetari i degës së AAK-së në Prishtinë, Avni Arifi, ka dalë kundër kësaj idesë së fundit.

Kjo pasi, sipas Arifit, riformatimi i Qeverisë derisa në krye të saj mbetet Isa Mustafa, “është e pakuptueshme dhe tërësisht jo racionale”.

“Asnjë ministër apo zëvendësministër nuk ka qenë më i dobët se Isa. Pa keqkuptim, asnjë ministër nuk ka pas ndonjë përformancë për të mbajtur në mend por nëse ky Kryeministër i thotë një ministri shko sepse ke përformancë të dobët është për tallje”, ka thënë Arifi në një postim të tijin në Facebook.

Ai thotë se “edhe njëqind “riformatizime” le të bëhen por kjo qeveri kurrë nuk do të arrijë as minimumin e performancës optimale”, pasi, siç thotë Arifi, “është “kalbur” në kokë”. 

© KOHA. Të gjitha të drejtat janë të rezervuara.