Sali Mekaj jep dorëheqje si kryetar i Gjykatës së Apelit dhe si gjykatës

21 Tetor 2016 - 12:44      

Kryetari i suspenduar i Gjykatës së Apelit, Sali Mekaj, ka dhënë dorëheqje nga kjo pozitë. KTV-ja ka mësuar nga burime brenda Këshillit Gjyqësor të Kosovës se Mekaj ka dhënë dorëheqje edhe si gjyqtar.

“Dorëheqjen nga të gjitha pozitat e ka ofruar para pak ditësh”, i ka thënë ky burim KTV-së.

Sali Mekaj ka qenë i suspenduar nga KGJK-ja në momentin kur kanë nisur hetimet ndaj tij dhe suspendimi, sipas këtij institucioni, ishte në fuqi deri në një vendim të plotfuqishëm të Gjykatës.

Mekaj akuzohet për keqpërdorim të detyrës zyrtare, një rast ku kishte shfrytëzuar autoritetin e tij për të ndërhyrë në një proces me fajde.
Dje, ka nisur procesi gjyqësor ndaj tij, derisa gjyqtari Shasivar Hoti, me një vendim, një ndër të parët e llojit të tillë, e ka mbyllur për publikun krejt procesin gjyqësor ndaj tij, ende pa nisur.

Në pyetjen e KTV-s drejtuar Këshillit Gjyqësor të Kosovës nëse Sali Mekaj ka dhënë dorëheqje edhe nga posti i anëtarit të Këshillit Gjyqësor të Kosovë, nga KGJK ka arritur përgjigja:
“Po, është e vërtetë që Mekaj i ka ofruar dorëheqjen si anëtar i Këshillit në mbledhjen e datës 13. 09. 2016 dhe po ky Këshill e ka miratuar këtë kërkesë për dorëheqje”.

© KOHA. Të gjitha të drejtat janë të rezervuara.