Mustafa u kërkon partive të EPP-së përkrahje për liberalizim të vizave

20 Tetor 2016 - 16:41      

Kryeministri i Republikës së Kosovës, Isa Mustafa, mori pjesë në samitin e liderëve të shteteve dhe të partive anëtare të Partisë Popullore Evropiane, i cili u zhvillua në Mastriht të Holandës. Aty kryeministri Mustafa kërkoi nga ata përkrahje në procesin e liberalizimit të vizave.

Të pranishëm ishdin liderët e shumë shteteve dhe qeverive të BE-së, duke përfshirë kancelaren Angela Merkel, drejtuesit e BE-së, presidenti i Këshillit Evropian, Donald Tusk, Presidenti i Komisionit Evropian, Jean-Claude Juncker dhe kryetari i Grupit të EPP-së në Parlamentin Evropian, Manfred Weber, transmeton Koha.net.

Gjatë samitit është biseduar për përgatitjet rreth takimit të Këshillit Evropian, si dhe për tema të tjera të rëndësishme për anëtarët e familjes së madhe të partive të qendrës së djathtë evropiane.

Mustafa është takuar me homologët e shteteve dhe liderët politikë të vendeve evropiane, të cilët kanë vlerësuar progresin dhe kanë shprehur përkrahjen e tyre të mëtejme për Kosovën.

Një takim të veçantë, kryeministri Mustafa e ka zhvilluar me kryesuesin e Grupit të EPP-së në Parlamentin Evropian, Manfred Weber, me ç’rast u diskutua në mënyrë të veçantë çështja e liberalizimit të vizave

Mustafa ka kërkuar përkrahjen e Grupit të EPP-së, si grupi më i madh në Parlamentin Evropian, për proceset eurointegruese të Kosovës, duke përfshirë liberalizimin e vizave për qytetarët e Kosovës.

Kryesuesi i Grupit të EPP-së, Manfred Weber vlerësoi progresin në Kosovë dhe theksoi mbështetjen Grupit të EPP-së në Parlamentin Evropian për Kosovën.

© KOHA. Të gjitha të drejtat janë të rezervuara.