Me letër anonime kërkohet shkarkimi i anëtarit kritik të Bordit të RTK-së

20 Tetor 2016 - 08:30      

Një letër pa vulë dhe anonime, me të cilën është kërkuar shkarkimi i anëtarët të Bordit të RTK-së, Hisen Berisha, është bërë objekt i trajtimit në Komisionin për administratë publike, qeverisje lokale dhe media.

Kjo gjë është konsideruar joserioze nga deputetë të pozitës dhe opozitës, të cilët kanë vlerësuar se Komisioni nuk mund të merret me letra anonime, shkruan sot Koha Ditore. Kryetarja e Komisionit, Xhevahire Izmaku, ka thënë se “letra ka një vulë”, mirëpo një gjë e tillë nuk është pranuar nga anëtarët e Komisionit, të cilët kanë thënë se vulë të RTK-së në këtë letër nuk ka. Në këtë letër thuhet se Hisen Berisha ka shkelur Ligjin për RTK-në, duke mos realizuar detyrat e tij për një periudhë të pandërprerë prej më shumë se tre muajsh pa aprovimin e Bordit. Kjo letër thuhet se vjen nga një anëtar i Bordit të RTK-së, që dëshiron të mbetet anonim.

Gazeta në nëntor të vitit të kaluar ka raportuar se si Hisen Berisha kishte kërkuar nga menaxhmenti i Radiotelevizionit të Kosovës të jepte llogari për borxhin prej 1 milion eurosh, të grumbulluar për vetëm nëntë muaj. Në një dokument me 28 faqe ai ka hedhur dyshime për korrupsion, keqpërdorime, punësime të parregullta, shkelje të Ligjit për RTK-në dhe veprime të tjera të paligjshme. Ka akuzuar menaxhmentin e RTK-së, në krye me drejtorin Mentor Shala, që jashtëligjshëm ka rritur shpenzimet për paga mbi 600 mijë euro për nëntë muaj.
(Tekstin e plotë mund ta lexoni sot në Koha Ditore)

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.