Referentja e Supremes akuzohet të ketë marrë 13 mijë euro ryshfet [video]

19 Tetor 2016 - 19:07      

Gati dy muaj pas ngritjes së aktakuzës, ka nisur procesi gjyqësor ndaj referentes së Gjykatës Supreme, Bukurije Haxhimurati, transmeton Koha.net.

Në fillim të seancës, avokati i saj, Florin Vertopi, ka kundërshtuar pjesëmarrjen e kamerës së KTV-së në gjykim.

Ai është thirrur në nenin 208 të Kodit të Procedurës Penale, por i cili në fakt rregullon incizimin e seancës për nevoja të Gjykatës dhe palëve e jo për mediat.

Gjyqtari Valon Kurtaj ka vendosur ashtu siç e parasheh neni 301, sipas të cilit lejohet incizimi audio dhe video i gjykimeve publike, megjithëse e ka kufizuar incizimin në vetëm disa minuta. E pandehura Bukurije Haxhimurati ka thënë se nuk e ndjen veten fajtore.

Ajo akuzohet se gjatë viteve 2011 deri 2013, në cilësinë e personit zyrtar, si referente në Gjykatën Supreme, ka marrë ryshfet shumën prej 13 mijë eurosh.

Kjo ishte bërë në këmbim të lehtësimit të lirimit nga burgu apo për zbutjen e dënimit të Dëshmitarit C, i cili është dëshmitar bashkëpunues në këtë rast.

Gjykata i ka dhënë afat 1 muaj mbrojtjes që të paraqesë me shkrim kundërshtimet për aktakuzën.

© KOHA. Të gjitha të drejtat janë të rezervuara.