Nis harmonizimi i qëndrimeve pozitë-opozitë për demarkacionin

18 Tetor 2016 - 14:19      

Në kuadër të fuqizimit të diplomacisë parlamentare të Kosovës dhe lobimit për çështje me interes të posaçëm për vendin tonë, kryetari i Kuvendit, Kadri Veseli, zhvilloi një takim me kryetarin dhe anëtarët e Komisionit parlamentar për Punë të Jashtme.

Në këtë takim u dakordua që grupet parlamentare të nxjerrin një deklaratë të përbashkët, rreth procesit të liberalizimit të vizave, në veçanti për kriterin e demarkacionit, për t’i garantuar të gjitha vendet e Bashkimit Evropian se “Kosova është e gatshme të përfundojë shënjimin e kufirit të saj me Malin e Zi”, mirëpo duke bërë të ditur se ka dallime midis forcave politike rreth mënyrës së shënjimit aktual të kufirit.

Veseli tha se “pas hartimit dhe nënshkrimit të kësaj deklarate, do të fillojnë menjëherë një seri vizitash në vendet e BE-së, për t’i siguruar të gjitha ato shtete se Kosova i ka plotësuar kriteret që i janë vënë asaj në këtë proces, dhe se qytetarët e Kosovës meritojnë që sa më shpejt të lëvizin lirshëm në zonën Shengen”.

Përfaqësuesit e opozitës, Pal Lekaj nga AAK-ja dhe Zafir Berisha nga Nisma, shprehën edhe njëherë qëndrimet e tyre lidhur me versionin aktual të marrëveshjes për demarkacionin me Malin e Zi, mirëpo theksuan përkushtimin për të qenë pjesë e deklaratës së përbashkët dhe e angazhimit në diplomacinë parlamentare, në funksion të lobimit për procese me interes për Kosovën.

Në këtë takim munguan anëtarët e Komisionit nga radhët e Lëvizjes Vetëvendosje dhe Listës Serbe. 

© KOHA. Të gjitha të drejtat janë të rezervuara.