Hyseni: 24 masa nga 113 janë realizuar plotësisht nga programi i MSA-së

18 Tetor 2016 - 12:25      

Ministri i Punëve të Brendshme, Skender Hyseni ka thënë se 24 masa nga 113 të Programit kombëtar për zbatimin e MSA-së janë realizuar plotësisht, raporton KTV.

“Programi kombëtar për zbatimin e MSA është miratuar në dhjetor të vitit të kaluar dhe në Kuvend në mars të 2016. Në përgjithësi nga 113 masa për të cilat MPB është përgjegjëse 24 janë realizuar tërësisht”, ka thënë Hyseni.

Ai më tutje ka thënë se ka nënshkruar marrëveshje bashkëpunimi policor me Turqinë, Letoninë dhe Maqedoninë, si dhe MPB ka nënshkruar me këto shtete marrëveshjet e ripranimit.
“Plotësisht ndryshimi për ligjin për të huaj është realizuar. Kemi nënshkrimin e marrëveshjeve të ripranimit me Turqinë, Maqedoninë dhe Letoninë. Nënshkrimet e marrëveshjeve për bashkëpunim policor kemi nënshkruar memorandum bashkëpunimi me Letoninë, Turqinë dhe Maqedoninë, ndërsa jemi në fazën e negocimeve me Danimarkën dhe Italinë”, ka thënë Hyseni.

Hyseni gjithashtu ka bërë të ditur se Kosova është në negocime me Interpolin.

“Jemi në negocime edhe me Interpolin. Prandaj ne po synojmë ta arrijmë është nënshkrimi i një memorandumi bashkëpunimi dhe unë besoj se kjo do të jetë marrëveshje e dytë specifike me një agjenci evropiane”, ka thënë ai.

Hyseni ka folur edhe për ngjarjet në Kumanovë, për të cilat ka thënë se sikur MPB të kishte ndonjë informacion të vogël që të mund ta parandalonte këtë ngjarje do ta bënte.

“Po të kishte MPB informacionin më të vogël të mundshëm do të bënte çmos ta parandalonte ngjarjen e Kumanovës”, ka thënë ai.
 

© KOHA. Të gjitha të drejtat janë të rezervuara.