Ambasadori italian: MSA-ja, instrument i rëndësishëm për integrim në BE

18 Tetor 2016 - 11:53      

Zëvendëskryeministri i parë i Kosovës, Hajredin Kuçi, priti në takim ambasadorin e Italisë, Piero Sardi, të cilin e njoftoi për zhvillimet aktuale në vend dhe e falënderoi për përkrahjen që Italia po jep në vazhdimësi për Kosovën, veçmas në mbështetjen në proceset eurointegruese.

Zëvendëskryeministri po ashtu ka falënderuar Italinë dhe ambasadorin për mbështetjen e tri prioriteteve të Qeverisë, integrimin në Bashkimin Evropian, fuqizimin e sundimit të ligjit dhe zhvillimin ekonomik.

Kuçi ka kërkuar bashkëpunim edhe më të ngushtë në implementimin e masave të dala nga Marrëveshja e Stabilizim Asociimit.

Ambasadori i Italisë në Kosovë, Piero Sardi, theksoi rëndësinë e implementimit të masave të dala nga MSA-ja, duke e konsideruar si një instrument të rëndësishëm për reformim dhe integrim në Bashkimin Evropian.

Zëvendëskryeministri Kuçi dhe ambasadori Sardi, në aspektin bilateral, diskutuan edhe për shtimin e përpjekjeve për bashkëpunim të thelluar në fushën e ekonomisë, me theks të posaçëm në krijimin e mundësive për tërheqjen e më shumë investimeve italiane në Kosovë. 

© KOHA. Të gjitha të drejtat janë të rezervuara.