Gjarpinjtë që po fusin frikën nxënësve në një shkollë të Kërçovës

17 Tetor 2016 - 21:55      

Gjarpinj me bollëk në oborrin e shkollës fillore në fshatin Cërvicë të Kërçovës së Maqedonisë. Ata po shkaktojnë ankth dhe tmerr çdo ditë për nxënësit që vijojnë mësimin në këtë shkollë.

“Kemi frikë të vijmë në shkollë”, tha një nxënës për Alstat M.

Përderisa gjendja në këtë shkollë është dramatike, që e rrëqeth secilin, drejtori i saj dhe organet përgjegjëse mendohen nëse do të riparojnë objektin e shkollës apo do të ndërtojnë një shkollë të re.

“Ne për këtë godinë shkollore bashkë me komunën e Kërçovës, gjegjësisht kryetarin, kemi bë një plan një projekt për ta rinovua shkollën, edhe pse jemi në hamendje nëse do bëjmë një godinë të re shkollore. Prandaj e kemi edhe projektin dhe si projekt përmes komunës e kemi dorëzuar edhe në Ministrinë e Arsimit”, u shpreh Kujtim Kasami, Drejtor i shkollës fillore “Naim Xhambazi”, Cërvicë Kërçovë.

“Kemi disa muhabete disa të dhëna kështu se me letër nuk kemi as ne as drejtori se gjoja duhet bë riparimi i shkollës, mirëpo ne dhe bashkëfshatarët nuk lejojmë të riparohet kjo shkollë, se kjo s`ka çka riparohet por duhet prishur dhe bërë një shkollë e re pa marrë parasysh sa nxënës kemi na duhet një shkollë e re”, theksoi Nishat Xhambazi, Kryetar i Këshillit të Prindërve.

Objekti i Shkollës Fillore në Cërvicë është i ndërtuar në vitet e shtatëdhjeta me kontributin e banorëve, ndërsa dije fitojnë mbi 60 nxënës, ndërsa mësim japin vetën 11 arsimtarë.