Beogradi kundër raportit për zbatimin e marrëveshjeve në Kapitullin 35

17 Tetor 2016 - 13:19      

Është e palejueshme që raporti i Kosovës për zbatimin e Marrëveshjeve të Brukselit të futet në kornizën negociuese të kapitullit 35, ka thënë Marko Gjuriq, transmeton Koha.net.

"Kur e kam parë kornizën e negociatave për kapitullin 35, e kam vërejtur se, për fat të keq, përpiluesi i raportit (Edita Tahiri),e ka thënë të vërtetën. Ky është turp”, citon b92 të ketë thënë Gjuriq sot në mbledhjen e Këshillin për Kosovën në Kuvendin e Serbisë.

Ai ka shtuar se përfaqësuesve të bashkësisë ndërkombëtare u ka thënë se Serbia e ka negociuesin e vet për anëtarësim në BE, se ajo është ministrja për Integrime Europiane Jadranka Joksimoviq, e jo Edita Tahiri.

Sipas fjalëve të Gjurqit, Qeveria e Serbisë është e përcaktuar qartë që çdo gjë të zgjidhet paqësisht e me dialog, porse, sipas tij, javëve të fundit, Prishtina, si dhe bashkësia ndërkombëtare, gjithnjë e më haptas, dialogun nuk po e shfrytëzojnë për normalizim marrëdhëniesh, por si platformë për imponimin e qëndrimit për pavarësi të Kosovës.

"Kurrë nuk kanë për ta shtyrë Serbinë që ta pranojë pavarësinë e Kosovës”, ka thënë ai.

© KOHA