Muhaxheri vazhdon të kundërshtojë ndërtimin e hidrocentraleve në Rugovë

14 Tetor 2016 - 08:07      

Kryeministri i Kosovës, Isa Mustafa, ambasadori austriak, Gernot Pfandler, kryetari i Pejës, Gazmend Muhaxheri, si dhe përfaqësues të kompanisë austriake “KelKos Energy”, të enjten kanë zhvilluar një takim që është tentuar të mbahet fshehtë, shkruan sot Koha Ditore.

Në këtë takim është diskutuar për projektin e kompanisë austriake për ndërtimin e pesë njësive gjeneruese për prodhimin e rreth 60 megavat energji elektrike në Lumbardhë. Projekti në vlerë prej 120 milionë eurosh është kundërshtuar nga qytetarët e Pejës, organizatat e shoqërisë civile në Pejë, komuna dhe kryetari Gazmend Muhaxheri.

Gjithashtu ai është në kundërshtim edhe me Planin zhvillimor të Komunës së Pejës për periudhën 2006-2025. Megjithëkëtë kryeministri Isa Mustafa ka thirrur një takim për të cilin nuk janë njoftuar mediat. Takimi është tentuar të mbahet fshehur edhe nga Ambasada e Austrisë në Prishtinë.

Asistentja e ambasadorit, nëpërmes telefonit ka thënë se për të gjitha informatat për takimin duhet të kontaktohet kryeministria. “Takimi do të mbahet në kryeministri, por ne nuk kemi njoftuar mediat dhe ai është i mbyllur, për çdo informatë mund të kontaktoni kryeministrinë”, ka thënë ajo.

Ndërkohë që zëdhënësi i Qeverisë, Faton Abdullahu, si dhe ministri i Punës dhe Mirëqenies Sociale, Arban Abrashi, që gjithashtu është edhe zëdhënës i Qeverisë, nuk u janë përgjigjur thirrjeve telefonike të gazetës.
(Tekstin e plotë lexojeni sot në Koha Ditore)

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.