Muharremaj thotë se KEDS-i nuk është serioz para qytetarëve

13 Tetor 2016 - 17:00      

Deputeti i Aleancës për Ardhmërinë e Kosovës, Bali Muharremaj, ka akuzuar KEDS-in për “maltretimet që po i bën qytetarëve me reduktimet e energjisë elektrike”.

Në një postim të tij në Facebook, kreu i AAK-së në Suharekë ka thënë se ka vendosur që çështjen e reduktimeve dhe problemeve të rrymës në këtë qytet ta shtrojë edhe në një nga seancat e ardhshme të Kuvendit të Kosovës.

Ky është postimi i Muharremajt në Facebook:

Kjo çfarë po bënë KEDS-i me qytetarët është shqetësuese.

Reduktime të energjisë elektrike në tërë Regjionin e Prizrenit, e më e theksuar situata po duket në Komunën e Suharekës.

Kjo nuk tolerohet, ngase qytetarët e kanë të pamundur ta kalojnë vështirsinë e jetës së rëndë nën këto kushte.

Rryma elektrike është më e shtrejta në rajon dhe duke ia shtuar edhe mungesen e saj me reduktime tash e disa muaj, e tejkalon çdo limit të durimit.

Si mund të mbijetojnë bizneset, sidomos ato që prodhojnë kundrejt kësaj papërgjegjësie dhe kurrfarë llogaridhënje nga dëmi që mund ta pësojnë. Arsyetimet e njejta se po rregullohet rrjeti apo edhe të tjera, nuk e shfaqin seriozitetin para qytetarit i cili e paguan rrymën elektrike të shtrenjtë.

Si deputet, kam vendosur që këtë çështje ta paraqes në ndonjëren nga seancat e ardhshme të Parlamentit të Kosovës, duke iu përgjigjur shqetësimeve të qytetarëve, të cilët më kanë kërkuar ta ngrisë ketë çështje, duke kërkuar llogari nga institucionet përkatëse

© KOHA. Të gjitha të drejtat janë të rezervuara.