Mesazh prekës i vajzës së Nysrete Kumnovës për fatin e vëllait të saj dhe të pagjeturve të tjerë [video]

13 Tetor 2016 - 16:33      

Nysrete Kumnova, njëra prej nënave më të zëshme në kërkim të fatit të të pagjeturve në Kosovë, ka qenë e ftuar në emisionin “Sot” të KTV-së.

Aty ajo edhe njëherë ka shprehur gjithë mllefin se si Qeveria e Kosovës nuk e pati asnjëherë prioritet çështjen e kthimit të personave të pa gjetur tash 17 vjet.

“Që 17 vjet, e di media, e di Kosova e di bota që ne kemi protestuar para hekrave, para dyerve të Parlamentit. Ju kemi drejtuar që prioritet të jetë kthimi i të gjeturve, të na kthejnë ashtu si janë...”, ka thënë Kumnova. “Jo të krahasohet çështja e të pagjeturve me tabela të veturave, kjo është e dhimbshme”, ka shtuar ajo.

E në postimin e një sekuence të kësaj bisede në profilin zyrtar të emisionit “Sot” në Facebook, ka komentuar vajza e saj, Vjollca Kumnova – Mamusha.

“A moj nona jeme qe 17 vjet mbete rrugëve të Kosovës e nëpër tv të Kosovës për zbardhjen e shumë djemve të Kosovës, e hargjove veten me mish e me shpirt, e shterre fytin, lotët tu sosen edhe në fund as eshtrat e djalit e vëllait tonë si gjetëm. Këto fjalë po më dalin prej zemrës së plastë, se nuk është fare e lehtë ta shohësh mamin e babin tu vujt qe 17 vjet për vëllanë e hasretit”, ka shkruar ajo.

© KOHA. Të gjitha të drejtat janë të rezervuara.