Kosova kërkon përkrahjen e Austrisë për anëtarësim në Interpol

13 Tetor 2016 - 11:52      

Ministri i Punëve të Brendshme i Republikës së Kosovës, Skender Hyseni është pritur në Vjenë nga ministri i Brendshëm i Republikës së Austrisë Wollfgang Sobotka, njofton kumtesa ministrore, transmeton Koha.net.

Gjatë një takimi ata kanë biseduar për një varg çështjesh të interesit të ndërsjellë dhe në funksion të forcimit të mëtejmë të marrëdhënieve bilaterale Kosovë-Austri, në fushën e sigurisë.
Në takimin e dy ministrave në mënyrë të veçantë u trajtua çështja e heqjes së vizave për qytetarët e Kosovës.

Hyseni nënvizoi se Kosova nuk duhet të mbetet vendi i vetëm i izoluar në Ballkan. Sobotka theksoi se Kosova duhet te përmbush edhe kriterin e ratifikimit të marrëveshjes për kufirin me Malin e Zi dhe të sigurohet se trendi pozitiv i menaxhimit dhe rrënjës së migrimit të paligjshëm nga Kosova drejt zonës Shengen të vazhdojë.

Çështje tjetër e veçantë që u trajtua nga dy ministrat ishte edhe terrorizmi global dhe ekstremizmi i dhunshëm.

Hyseni kërkoi përkrahjen e mëtejme të Austrisë edhe sa i përket anëtarësimit të Kosovës në INTERPOL dhe avancimit të bashkëpunimit me Europol-in, si dy mekanizma të rëndësishëm ndërkombëtar të bashkëpunimit policor.

Ai i kërkoi ministrit Sobotka që të behet më shumë trysni me qellim që Beogradi të ndërpresë këto ndjekje të pabaza dhe urgjentisht të lirojë nën-kolonelin e PK-së, Nehat Thaçin , i cili vazhdon të mbahet në paraburgim në Serbi.

© KOHA. Të gjitha të drejtat janë të rezervuara.