Lajmet vihen nën mbrojtje ligjore nga riprodhimi për 12 orë

12 Tetor 2016 - 11:35      

Kuvendi i Kosovës ka miratuar dje Projektligjin për të drejtat e autorit dhe të drejtat e përafërta. Me këtë, tashmë ligj, vendosen kufizime edhe në shfrytëzimin, përkatësisht riprodhimin e krijimeve gazetareske.

Me pikën 1.9 të nenit 12 tani lajmet e ditës dhe raportimet janë krijime të mbrojtura, të paktën për një afat të caktuar kohor, shkruan sot “Koha Ditore”.

“Lajmet e ditës dhe informacionet e ndryshme ,që kanë karakter të raportimeve të rëndomta të medieve, mund të riprodhohen vetëm pasi të kenë kaluar së paku dymbëdhjetë orë nga publikimi i tyre”, shkruhet në amendamentin e dytë.

Ky nen është bazuar në praktikën austriake.

“Ajo është një e mirë duke u bazuar në praktikën e Austrisë dhe nuk ka tjetër. Kemi propozuar të këtë limit kohor, por që gjërat mund të ndryshojnë vetëm nëse kompanitë në këtë rast kanë një marrëveshje të caktuar. Po shpresojmë që do të funksionojë si i tillë”, ka thënë Ardita Zejnullahu, drejtoreshë ekzekutive e Asociacionit të Medieve të Pavarura Elektronike të Kosovës.

Ky projektligj u miratua me 60 vota për, 12 abstenime dhe pa asnjë votë kundër.  

© KOHA. Të gjitha të drejtat janë të rezervuara.