Hoxhaj: Qasja e Serbisë për pronat tona është kolonialiste dhe raciste

11 Tetor 2016 - 16:26      

Ministri i Punëve të Jashtme i Republikës Kosovës, Enver Hoxhaj, në një intervistë ekskluzive për televizionin shqiptar në Maqedoni “TV ART” në diskutimin për tema të shumta aktuale, është pyetur edhe për qasjen e Serbisë ndaj Kosovës ditëve të fundit, veçanërisht pas miratimit të ligjit për kombinatin “Trepça” në Kuvendin e Kosovës.

Hoxhaj ka thënë se kjo është një qasje kolonialiste që fatkeqësisht është e pranishme në Serbi.

“Qasja e kryeministrit serb, Vuçiq në programin qeverisës, që ai Kosovën ta sheh si pronë, apo që pronat janë të rëndësishme në raport me Kosovën, kjo ka të bëj edhe me Trepçën, edhe me Gazivodën, dhe me tema të tjera të cilat i ka ngritur Vuçiqi, kjo qasje flet qartë se Serbia ende ka një qasje kolonialiste dhe raciste në raport me Kosovën, dhe për ne kjo është e papranueshme. Këtë qëndrim që unë po u'a them juve, e kam mbajtur në këto 3-4 katër muajt e fundit në të gjitha takimet që kam pasur”, ka thënë Hoxhaj.

Në këtë intervistë ministri Hoxhaj ka folur edhe për marrëdhëniet Kosovë-Maqedoni, dhe thellimin e bashkëpunimit ndërshqiptarë në rajon.