Kosova mbron dhe garanton të drejtat kulturore dhe religjioze të të gjitha komuniteteve

11 Tetor 2016 - 15:32      

Zëvendëskryeministri i parë i Kosovës, Hajredin Kuçi, priti në takim Raportuesen Speciale për të Drejtat Kulturore të Kombeve të Bashkuara, Karima Bennoune.

Kuçi e njoftoi Bennounen se Kosova është shtet që garanton të drejta të barabarta të të gjitha komuniteteve, dhe respektimin e të drejtave religjioze dhe kulturore pa diskriminim.

“Mbrojtja e trashëgimisë kulturore në Kosovë garantohet me Kushtetutën e Kosovës, legjislacionin në fuqi dhe ka bazamentin e mbrojtjes qysh në Planin e Ahtisaarit. Institucionet e Kosovës janë të përkushtuara që të garantojnë mbrojtjen e trashëgimisë kulturore në Kosovë pa marrë parasysh përkatësinë etnike apo religjioze”, ka thënë zëvendëskryeministri Kuçi.

Kuçi dhe Bennoune diskutuan edhe për rëndësinë e kulturës si faktor në krijimin e një ambienti të qetë dhe në harmoni për bashkëjetesë për të gjitha komunitetet.

Zëvendëskryeministri potencoi se Qeveria e Kosovës ka perspektivë dhe orientim të qartë proevropian, ku të drejtat kulturore dhe religjioze të të gjitha komuniteteve mbrohen dhe garantohen gjithmonë duke respektuar laicitetin e shtetit. 

© KOHA. Të gjitha të drejtat janë të rezervuara.