Ministri serb kërkon “luftë ligjore” për Trepçën

11 Tetor 2016 - 10:44      

Ministri i Energjetikës dhe i Minierave në Serbi, Aleksandër Antiq, ka deklaruar se do të formohet një ekip i ekspertëve i cili “do të luftojë për kombinatin Trepça” me mjete të plota juridike.

Antiq, duke folur në RTS, ka theksuar se Qeveria do të provojë të gjejë zgjidhje e cila do t’i mbrojë më së miri interesat serbe.

“Qytetarët e Serbisë nuk duhet të kenë dilema se Qeveria e Serbisë nuk i mbron interesat e të gjithë qytetarëve”, ka shtuar Antiq, transmeton Koha.net.

Ai ka shpjeguar se Fondi për Zhvillim i Republikës së Serbisë është pronari kryesor i Trepçës me 56 për qind të pronësisë, ndërsa ka shtuar se do të formojë një ekip ekspertësh dhe se është e domosdoshme që në zgjidhjen e këtij problemi të përfshihen edhe ekspertë nga Fakulteti Juridik dhe Fakulteti Ekonomik i Minierave dhe Gjeologjisë.

“Jemi të vetëdijshëm për të gjitha problemet, por do të luftojmë me të gjitha mjetet juridike. Besoj se Perëndimi do ta njohë të drejtën e pronës si një e drejtë universale”; shtoi ministri serb.

Ai pret që institucionet ndërkombëtare të ofrojnë përkrahje, pasi që, siç tha ai, fjala është për “shkelje ligjore që po e demonstrojnë përfaqësuesit shqiptarë”.

Ministri serb tha më tej se “Trepçën e ka formuar Serbia dhe në të i ka investuar të gjitha. Nuk mund të flasim për Trepçën pa Serbinë në të”.

Ai shtoi se nga fillimi i dialogut me Prishtinën, Qeveria e Serbisë tenton që të paraqes në tavolinën e diskutimit çështjet e pronësisë.

“Dialogu nuk mund të jetë i suksesshëm nëse nuk diskutohet për gjithçka. Një çështje kaq e rëndësishme duhet të jetë pjesë e dialogut”, ka përfunduar Antiq.  

© KOHA. Të gjitha të drejtat janë të rezervuara.