Eksperti i komunikacionit nuk pret ulje të vdekshmërisë me Ligjin e ri të trafikut [video]

10 Tetor 2016 - 21:33      

Sonte në sezonin e 4 të emisionit “Puls” të KTV-së u debatua për zbatimin e Ligjit të ri për trafikun rrugor.

Visar Baxhuku, inxhinier i komunikacionit rrugor, ka thënë se nga Ligji i ri për trafikun rrugor nuk pret ulje të numrit të vdekshmërisë në komunikacion.

“Ky ligj nuk do të mund të implementohet sikur ligji i kaluar. Unë mendoj se vetëm dy muajt e parë do të zbatohet dhe më pastaj prapë do kemi shtim të aksidenteve me fatalitet. Kjo ka të bëjë me një sërë faktorësh. Së pari, ne e kemi një Këshill për Siguri rrugore i cili nuk është gjallë, sikur mos të ekzistojë fare”, tha ndër të tjera ai.

Baxhaku tha se Kosova është i vetmi vend në rajon që nuk ka radarë statikë të vendosur nëpër rrugët e Kosovës.

“Si të presim të ndalen aksidentet? Nuk mundet policia ta mbulojë tërë territorin e Kosovës”, shtoi ai.

“Kur jemi tek siguria, ju e dini si merren patentë shoferët. Shitja e tyre është problem në vete prandaj mos pritni të ndikojë pozitivisht Ligji i ri i trafikut rrugor”, theksoi ai. 

© KOHA. Të gjitha të drejtat janë të rezervuara.