Haliti e Dërguti përfaqësojnë Kosovën në KiE

10 Tetor 2016 - 20:39      

Delegacioni nga Kuvendi i Kosovës, i përbërë nga nënkryetarët Xhavit Haliti dhe Aida Dërguti, po merr pjesë në punimet e Sesionit të Katërt të Rregullt të Asamblesë Parlamentare të Këshillit të Evropës (APKE).

Gjatë punimeve, më 5 shtator 2016, Byroja e APKE-së ka marrë vendim lidhur me zbatimin e paragrafit të 13-të të Rezolutës 2094 (2016) për situatën në Kosovë dhe rolin e Këshillit të Evropës, i cili parashikon ngritjen e nivelit të bashkëpunimit të APKE-së me Kuvendin e Kosovës.

Ndërkaq sot, gjatë Sesionit të Katërtë të Rregullt të APKE-së ky vendim u ratifikua me shumicë votash.

“Sipas këtij vendimi, që prej janarit të vitit 2017, Kosova ka të drejtë të caktojë një delegacion prej tre (3) anëtarësh, ku do të përfaqësoheshin pozita, opozita dhe minoritetet”, thuhet në një njoftim për media.

Komunikata thekson se përfaqësuesit e Serbisë dhe vendeve që nuk e kanë njohur Kosovën, kanë lobuar që t’ia pamundësojnë delegacionit nga Kuvendi i Kosovës pjesëmarrjen në punimet e APKE-së.

“Delegacioni i Kosovës në bashkëpunim me delegacionin e Kuvendit të Shqipërisë, të cilin e udhëheqë znj. Valentina Leskaj, si dhe me anëtarët e shteteve mike të Republikës së Kosovës, zhvilluan lobim të fuqishëm. Në veçanti delegacioni i Kuvendit të Kosovës falënderon znj. Valentina Leskaj, e cila është edhe pjesë e Byrosë të APKE-së, për angazhimin e saj me përkushtim gjatë mbledhjeve të Byrosë, Komisionit për Çështje Politike dhe Demokraci, seancave Plenare, që Kuvendit të Kosovës t’i jpet e drejta që të përfaqësohet me delegacionin e tij për herë të parë në APKE, institucion në të cilin bëjnë pjesë delegacionet e 47 vendeve anëtare, dhe të ketë mundësi për lobim si dhe të përfitojë asistenca të ndryshme në ndërtimin dhe zhvillimin e diplomacisë parlamentare, të cilat ofrohen nga Këshilli i Evropës”, përfundon komunikata. 

© KOHA. Të gjitha të drejtat janë të rezervuara.