Thaçi, BE-së: Mos lini boshllëqe – mund të mbushen nga radikalizmi

8 Tetor 2016 - 18:47      

Presidenti i Kosovës, Hashim Thaçi ka marrë pjesë në Kongresin e Lëvizjes Panevropiane, ku bashkë me presidentin e Shqipërisë, Bujar Nishani dhe atë të Maqedonisë, Gjorge Ivanov kanë folur në një panel për perspektivën evropiane të Ballkanit Perëndimor.

Para shumë përfaqësuesve shtetërorë, diplomatëve dhe përfaqësues të jetës publike të Austrisë, Thaçi ka thënë se këto diskutime janë një burim i inspirimit të përpjekjeve tona, të ëndrrave dhe dedikimit për të qenë plotësisht pjesë e të ardhmes evropiane.

“Jo vetëm gjeografikisht, por edhe përmes ndarjes së vlerave që e përcaktojnë kontinentin tonë. Nëse kthehemi mbrapa, shohim se zgjerimi i BE-së ka qenë njëra nga politikat më të suksesshme të BE-së. Ai i ka transformuar shoqëritë dhe vendet dhe i ka bërë ato të lira, demokratike, me prosperitet dhe me paqe”, ka shtuar ai.

Sipas Thaçit, këto janë elementet që e nxisin dedikimin tonë për të arritur dhe për të bërë reforma të thella në të gjitha aspektet e qeverisjes.

Ai ka shtuar se kjo është arsyeja që nganjëherë i shtyjmë proceset që konsiderohen si të vështira ose që jo medoemos parapëlqehen nga populli, porse janë në interesin më të madh të qytetarëve dhe kontribuojnë për të çuar drejt integrimit evropian.

“Rruga për të arritur këtë qëllim është integrimi evropian. Njëlloj, sikurse BE-ja dhe kontinenti i Evropës nuk është i kompletuar dhe nuk mund ta realizojë potencialin e saj në aspektin e sigurisë, në mirëqenie dhe në vlera, nëse Ballkani Perëndimor mbetet jashtë saj”, ka nënvizuar ai.

Në Kongresin e Lëvizjes Panevropiane, presidenti Thaçi ka thënë se anëtarësimi në BE përkon me përkrahjen e 95 për qind të popullit të Kosovës dhe, përderisa premtimi i së ardhmes evropiane mbetet real, atëherë ndryshimi pozitiv është i mundshëm.

“Këto ndryshime do të manifestohen në zhvillimin e secilit vend rreth prosperitetit ekonomik, sundimit të ligjit dhe institucioneve të qëndrueshme, por po ashtu edhe në aspektin e bashkëpunimit regjional dhe në tejkalimin e ndryshimeve të së kaluarës”, ka thënë ai.

Para shumë diplomatëve, përfaqësuesve shtetërorë, pjesëmarrës në këtë kongres, Thaçi ka theksuar se është e rëndësishme që BE-ja të mbetet e fokusuar në këtë pjesë të kontinentit dhe të sigurojë se zgjerimi të mbetet në tavolinë.

Ai ka shtuar se deri më tani Kosova ka qenë në gjendje të bëjë përparim të madh për integrimin në BE. Sipas Thaçit, marrëveshja e Stabilizim-Asociimit e Kosovës me BE-në ka hyrë në fuqi në fillim të këtij viti, duke e bërë atë si marrëdhënien e parë kontraktuale ndërmjet vendit tonë dhe BE-së.

“Por, prapë ne duhet të pranojmë se pa një normalizim të plotë të marrëdhënieve ndërmjet Kosovës dhe Serbisë, asnjëri nga dy vendet s’do të mund t’i bashkohet këtij Unioni. Kjo edhe është arsyeja që ne jemi aq të përkushtuar në dialog për normalizimin e marrëdhënieve me Serbinë”, ka theksuar ai.

Presidenti Thaçi ka folur edhe për qëndrueshmërinë e BE-së, duke thënë se Kosova është ende duke pritur për liberalizim të vizave për qytetarët e saj, shumë vjet pasi fqinjët e saj t’i kenë pranuar këto privilegje.

“Si rezultat i këtij trajtimi të padrejtë, kosovarët vazhdojnë të mbesin populli më i izoluar në Ballkan”, ka shtuar ai.

Në fund presidenti ka thënë se BE-ja duhet të pranojë se kudo që lë një boshllëk, do të dalë dikush tjetër që është i gatshëm ta mbushë atë. Sipas tij, sa më shumë të ketë angazhim të BE-së, do të mbetet më pak hapësirë për fuqitë më pak demokratike të huaja dhe kërcënime të radikalizmit.

“Në vend të kësaj, kjo premton prosperitet, më shumë stabilitet, më shumë reforma dhe më shumë paqe”, ka shtuar ai. 

© KOHA. Të gjitha të drejtat janë të rezervuara.