Hamiti do që Kuvendi të bëhet vendimmarrës për Trepçën

7 Tetor 2016 - 17:19      

Nënkryetari i Kuvendit të Kosovës, deputeti i LDK-së, Sabri Hamiti, ka propozuar ndryshimin e një amendamenti në Projektligjin për Trepçën, në bazë të të cilit Kuvendit të Kosovës do t’i jepej më shumë fuqi.

“Unë po dua të flasë për përgjegjësitë e Kuvendit që duhet të jenë brenda Ligjit, aq më tepër nëse aksionar është që Qeveria të jetë aksionare e 80 për qind të aksioneve”, ka thënë Hamiti.

Ai ka kërkuar që në Nenin 8, Paragrafi 9, të shtohet në vendimmarrje edhe Kuvendi i Kosovës.

Neni 8, Paragrafi 9 thotë se “Lidhur me çështjet që kanë të bëjnë me themelimin, transformimin dhe shuarjen e njësive biznesore ose investimet në projekte të reja, Bordi Mbikëqyrës duhet të marrë pëlqimin e Qeverisë së Republikës së Kosovës si aksionari kryesor”.

Hamiti ka kërkuar që për këto të votohet në Kuvend.

Edhe Visar Ymeri, teksa ka folur në emër të Vetëvendosjes ka thënë se po kërkojnë që Kuvendi i Kosovës të përfshihet në vendimmarrje.

© KOHA. Të gjitha të drejtat janë të rezervuara.