Raport i KTV-së për debatin mbi Trepçën sot në komisionin parlamentar [video]

6 Tetor 2016 - 19:10      

Partneri serb i qeverisë po vazhdon të mos pranojë projektligjin për të ardhmen e Trepçës.

Sasha Milosavljeviq nga Lista Serbe, ka paralajmëruar se njëjtë do të vazhdojë edhe në shqyrtimet tjera nëse nuk merren parasysh kërkesat e serbëve, raporton KTV.

Reagimi i tij ngjalli debat te një pjesë e të pranishmëve në komisioni për zhvillim ekonomik.

Kryetari i komisionit dhe ministri i Zhvillimit Ekonomik ia përkujtuan të 6 ftesat e bëra në adresë të përfaqësuesve serbë në takime, por që asnjëherë nuk iu përgjigjen. 

Përderisa deputetja Sala Berisha-Shala ia kujtoi vitet e administrimit të UNMIK-ut, ku shqiptarë e serbë nxorën bashkë rezolutën, duke kundërshtuar një rregullore të kësaj administrate, që e dërgonte Trepçën drejt falimentimit.

Sipas ministrit Stavileci, Trepça do të ketë bord mbikëqyrës dhe bord menaxhues, ndërsa do të lihet e drejta edhe e shitjes së aksioneve të saj.

Një varg vërejtjesh i dha Visar Ymeri, që e zëvendësoi Glauk Konjufcën. Drejtori i Trepçës në jug, Ahmet Tmava, tha se bashkëpunimi me menaxhmentin në veri është shumë i mirë deri atëherë kur nuk përzihet politika.

Në këtë pjesë të vendit punëtorët serbë të Trepçës protestuan, duke bllokuar rrugën magjistrale Mitrovicë-Rashkë dhe një protestë e mbajtën në Leposaviq, duke mos u pajtuar me ligjin për këtë ndërmarrje.

Edhe Instituti Gap ka gjetur katër shkelje procedurale dhe të parimeve demokratike të aprovimit të legjislacionit.

© KOHA. Të gjitha të drejtat janë të rezervuara.