Agjenda e plotë e seancës së nesërme plenare, votohet për Trepçën

6 Tetor 2016 - 16:30      

Seanca plenare e Kuvendit të Republikës së Kosovës, për nesër ka ndërruar orarin e zakonshëm.

Do të nisë në orën 15:00, e shkak për këtë është ndeshja në mes të Kosovës dhe Kroacisë në kuadër të kualifikimeve për kampionatin botëror në futboll “Rusia 2018”.

Në rend dite është edhe shqyrtimi i parë i Projektligjit për Trepçën. Ligji ka ngjallur shumë debate ne mesin e faktorit shqiptar, e shumë kundërshtime nga serbët edhe në qeveri e Kuvend, edhe tek ata që punojnë në gjigantin ekonomik të Kosovës.

Në agjendë janë gjithashtu edhe votimi i dy Propozim-Rezolutave të dala nga mocionet e ngritura nga deputetët e Vetëvendosjes, ajo për Kodin Telefonik të Kosovës si dhe ajo me situatën aktuale politike në pjesën veriore të Republikës së Kosovës.

Kjo është agjenda e plotë e seancës së nesërme:

1. Koha për deklarime jashtë rendit të ditës,

2. Koha për pyetje parlamentare,

3. Miratimi i procesverbalit nga seanca e mëparshme,

4. Shqyrtimi i parë i Projektligjit për Trepçën,

5. Votimi për emërimin e një anëtari në Komisionin për Kërkesa Pronësore,

6. Votimi i Projektligjit për investimet strategjike në Republikën e Kosovës,

7. Votimi i Propozim-Rezolutës lidhur me Kodin telefonik shtetëror të Republikës së Kosovës,

8. Votimi i Propozim-Rezolutës lidhur me situatën aktuale politike në pjesën veriore të Republikës së Kosovës,

9. Shqyrtimi i parë i Projektligjit nr. 05/L-117 për Akreditim,

10. Shqyrtimi i dyë i Projektligjit nr. 05/L-047 për ndryshimin dhe plotësimin e Ligjit nr. 04/L-065 për të drejtat e Autorit dhe të drejtat e përafërta,

11. Zgjedhja e një (1) anëtari të Këshillit Prokurorial të Kosovës,

12. Shqyrtimi i Raportit mbi gjendjen në Shërbimin Civil të Republikës së Kosovës për vitin 2015,

13. Shqyrtimi i Raportit të Agjencisë së statistikave të Kosovës për vitin 2015.

© KOHA. Të gjitha të drejtat janë të rezervuara.