Çfarë parasheh Ligji për Trepçën [video]

5 Tetor 2016 - 19:11      

Qeveria tashmë ka proceduar në Kuvend projektligjin, i cili gjigantin metalurgjik Trepça e transformon në shoqëri aksionare, ku pronare e 80 për qind të aksioneve do të jetë ekzekutivi dhe pronarë të 20 për qindëshit tjetër do të jenë punëtorët, raporton KTV.

Ministri i Zhvillimit Ekonomik, Blerand Stavileci, gjatë prezantimit të projektligjit, ka theksuar se Trepçës kanë dashur t’i japin trajtën e një shoqërie aksionare, e cila iu hap rrugë investimeve.
Por projektligji është kundërshtuar nga ministrat serbë të Kosovës.
Derisa për zëvendësin e Isa Mustafës, Branimir Stojanoviq, projektligji është më shumë politik se sa ekonomik, ministri i Pushtetit Lokal, Mariq, ka theksuar se komuniteti serb është plotësisht i përjashtuar nga ky proces.

I menjëhershëm ka qenë reagimi i ministres për dialog, Edita Tahiri, e cila ka kërkuar largimin e ngjyrimeve etnike, pasi sipas saj, kjo nuk ndihmon proceset e tilla.

Pavarësisht debatit, shefi i ekzekutivit e ka cilësuar projektligjin si zgjidhjen optimale për Trepçën, duke theksuar se resurset minerare janë pronë e Kosovës dhe ato nuk mund të negociohen.
Ligji pritet të miratohet në seancën e së premtes, pasi dihet se më 2 nëntor ishte afati i fundit për likuidim.

© KOHA. Të gjitha të drejtat janë të rezervuara.